Møllesennep Descurainia pinnata (Walter) Britton

Møllesennep er eittårig og spreidd til tett håra med sprikjande, uregelrett fleirgreina (dendroide) hår og ofte med vorteforma kjertlar. Han kan bli opptil 60 cm høg, men dei plantane som er funne i Noreg, er ungplantar utan fullt utvikla stenglar og utan frukt. Blada er 1–2 gonger finna med heile eller tanna småblad. Blomestanden er ein klase som strekkjer seg mykje i fruktstadiet, med sprikjande fruktskaft. Kronblada er 1–3 mm lange og frå lysgule til kremkvite. Frukta er ei smalt klubbeforma (breiast øvst) til linjeforma langskulpe, og ikkje knudrete. Ho sit på eit sprikjande til noko nedbøygd skaft. Frøa sit i to rekkjer i kvart skulperom.

Møllesennep er di- og tetraploid (ein sjeldan gong kanskje heksaploid) med grunntal x = 7 og kromosomtala 2n = 14, 28 (42). Teljingar er ikkje utførte på norsk materiale.

Møllesennep er framand og berre funnen på skrotemark ved møller. Det sikraste funnet er ved mølla på Bøleveien i Skien (Telemark) i 1968. Plantar funne ved Moss Aktiemøller i 1973 og ved Kambo mølle i 1971 i Moss (Østfold), er svært unge, ikkje mogleg å identifisere sikkert, men kan høyre til denne arten. Dei er berre bestemde til slekta Descurainia. Arten har kome til Noreg med nordamerikansk korn.

Arten er heimleg og vanleg i om lag heile Nord-Amerika sør for Arktis og i nordlege Mexico. Han er berre funnen nokre få stader elles i Europa.

Møllesennep er ein svært formrik art med seks aksepterte underartar (sjå Goodson og Al-Shehbaz 2010). Det er ikkje kjent kva for underart(ar) det norske materialet kan tilhøyre, og for plantane frå Moss er det heller ikkje mogeleg å finne ut. Dei er for lite utvikla.

Elven R og Hegre H. Møllesennep Descurainia pinnata (Walter) Britton. www.artsdatabanken.no/Pages/345566. Lasta ned <dag.månad.år>.